BUGUIAS, BENGUET – Pimmusay ti maysa a mannalon kalpasan a nagaburan iti nargaay a daga idiay Bayoyo, Buyacaoan, Buguias, Benguet idi kalman, Oktobre 24.
Nabigbig ti biktima a ni Jasper Jones D. Amoy, 24-anyos, taga-Bay-o, Central, Kibungan, Benguet.
Iti interview ti Bombo Radyo, kinuna ni PMaj. Lorenz Paul Claveria, Officer-In-Charge ti Buguias Municipal Police Station, manarimaan ti panaggarden ti biktima idi napasamak ti panagreggaay a nangitunda iti pannakagaburna.
Sigun pay kenni PMaj. Claveria, saan unay a napigsa ti tudo idiay Buyacaoan, Buguias idi napasamak ti insidente ngem posible a linmukneng ti daga gapu iti awan sardengna a panagtudo.
Dinakamatna a narekober ti maseknan a pamilya ti bagi ti biktima ken intarayda daytoy iti ospital ngem naideklara a dead-on-arrival.
Awan met ti dadduma pay a nadangran agsipud ta maymaysana idi napasamak ti insidente.
