Kinumpirmar iti Office of the Ombudsman a manarimaan iti imbestigasion ti saan a bummaba iti duapulo ket innem a kameng iti Kamara gapu iti mapapati a pannakairamanda kadagiti anomalia iti government infrastructure projects.
Sigun kenni Assistant Ombudsman Mico Clavano, naalan iti opisinada ti Statements of Assets, Liabilities and Net Worth (SALN) dagiti kongresista kalpasan a nagtulnog ti Kamara iti subpoena.
Kinunana a paset daytoy iti nalawlawa nga imbestigasion iti mapapati nga “scheme” kadagiti infrastructure projects, a saan laeng a limitado iti flood control projects.
Impasigurado met iti Ombudsman nga agtuloy ti kampaniada kontra iti korapsion ken kasuan dagiti mapaneknekan a karaman iti daytoy.
Kabayatanna, adda dagiti sumagmamano metlaeng a naipila seknan iti flood control anomalies kontra iti sumagmamano a sigud a mammanday-linteg, opisial iti DPWH, ken contractors iti nagduduma a proyekto iti pagilian.
