Impakaammo ti National Disaster Risk Reduction and Management Council (NDRRMC) a dumanon iti 26 a lugar iti Pilipinas ti nalayos gapu iti bagyo a Crising.
Malaksid iti dayta, naipakaammo pay a tallo nga indibidual ti mapukpukaw.
Dagiti nalayos ket pakairamanan ti dua a lugar sadiay Region 1, tallo sadiay Mimaropa, dua sadiay Region 6 ken sangapulo ket siyam a lugar sadiay Region 7.
Gapu iti dayta, dumanon iti 215,000 nga indibidual ti naapektaran.
Maibasar iti datos ti nasao nga ahensya, agdama nga agnanaed dagiti 3,556 a pamilya wenno 11,689 nga indibidual kadagiti evacuation centers bayat a 1,781 a pamilya met ti nagnaed kadagiti dadduma a lugar.
Kabayatanna, agarup dua pulo ket innem a kalsada ken uppat a rangtay ti saan a passable gapu iti epekto ti bagyo a Crising.
Malaksid iti dayta, 1,875 nga indibidual ti na-stranded kadagiti sumagmamano a sangladan.
Impakaammo pay ti Philippine Coast Guard nga 87 a bangka, 37 a motorbancas ken 591 a rolling cargoes ti na-stranded.
