Nakaawiden ti duapulo ket innem a Pilipino manipod idiay Israel babaen iti voluntary repatriation program ti Philippine Embassy, sigun iti statement ti embahada idi kalman.
Kinaduaan dagitoy ni Philippine Ambassador Aileen Mendiola ken ti DMW-OWWA team iti Allenby Border Crossing tapno maipasigurado ti nasayaat a panagballasiwda manipod idiay Israel paturong idiay Jordan.
Inyurnos pay ti embahada ti naglugananda, transit visa, travel documents, ken tiket ti eroplano.
Sakbay a pimmanaw, immuna a nagdagus dagiti Pilipino iti pagkamangan ti Department of Migrant Workers (DMW) a nakaikkanda iti relief packages, libre a legal assistance, ken orientation para iti reintegration benefits-da inton agsublida iti Pilipinas.
Kabayatana, maipoproseo paylaeng ti maikadua a batch ti repatriation a pakaibilangan ti tallo pulo ket tallo a Pilipino.
Maipalagip a naisayangkat ti repatriation iti tengnga ti bumarbara a tension iti nagbaetan ti Israel ken Iran.
Nangrugi ti panagbinomba ti dua a pagilian idi Hunio a trese kalpasan nga inakusaran ti Israel ti Iran nga asidegen a maakaramid ti nuclear weapon, banag a pinaglibakan ti Tehran.
