DAMAG ESPESYAL- Idi Abril 12, 2024, limed a nagkallaysa da AK ken Adinda Kanza Azzahra idiay Indonesia.
Nupay kasta, naduktalan ni AK idi Abril 24, 2024 ti kinapudno a saan gayam a babai ti inasawana nu di ket padana metlaeng a lalaki. Nagam-ammo dagitoy iti social media, naaddaanda ti napintas a komunikasyon agingga a nagdesisyon dagitoy nga agkita iti personal. Iti umuna pailaeng a panagkitada, na-love at first sight a dagus ni AK kenni Azzahra gapu iti kinapintasna.
Iti namin-ado a daras a panagkitkita dagiti dua, adda ti nadlaw ni AK a sabsabli kenni Azzahra.
Kanayon nga adda ti nakakabil a belo wenno veil iti rupa ni Azzahra ngem saan a nagduadua ni AK gapu ta boses babai daytoy. Impagarup laeng ni AK a managbabain ti nobyana ken saan a nagbayag ket inawisna nga agkallaysada.
Pinatgan met daytoy ni Azzahra ngem saanna a kayat nga iparehistro ti panagkallaysada.
Limed garud a nagkallaysa dagitoy ngem nangrugin nga agduadua ni AK gapu ta awan ti napaspasamak a honeymoon ken saan pay nga ikkaten ti asawana ti veil iti rupana.
Gapu iti daytoy, nag-imbestiga ni AK ken ti pamilyana agingga a naduktalanda iti mismo nga ama ni Azzahra a lalaki daytoy.
Inaklon met ni Azzahra a nilokona ni AK gapu ta kasapulanna ti kwarta.
Sumangsango ita ni Azzahra iti kaso a panaglabsing iti Article 378 iti Criminal Code ti Indonesia. Posible metlaeng a maibalud daytoy iti agingga uppat a tawen.
