Inaklon ti Department of Labour and Employment (DOLE) a nababa ti “turnout” dagiti agsapsapul ti pangngedan nangruna dagiti naikkat a Pilipino a mangngged iti Philippine offshore gaming operator (POGO).
Iti press briefing, inlista ni DOLE Secretary Bienvenido Laguesma dagiti posible a rason ti nababa a bilang dagiti naapektaran nga empleado ti POGO a tumabuno kadagiti mega job fairs.
Inlawlawag ti nasao nga opisial a ti posible a rason dagiti sigud a mangmangged iti POGO ket patienda a saan a matuloy ti December 31 deadline, ken posible a kayatda a mangged iti kapada a trabaho a dakkel ken nangatngato ti benipisio daytoy.
Nupay kasta, kinuna ti nasao nga opisial nga agtultuloy latta ti panagtulongda kadagiti naapektaran nga IGL workers.
Maipalagip a bayat ti panagbitla ni President Ferdinand “Bongbong” Marcos Jr. iti State of the Nation daytoy, kinunana nga amin a POGO ket maipawil kalpasan a naduktalan nga adda pakainaiganda iti krimen pakairamanan ti human trafficking, serious illegal detention, ken money scams.
Idi Setiembre, kinuna ti nasao nga ahensia a mapatta-patta a dumanon iti 40,000 a Filipino workers ti naikkat a mangmangged a Pilipino gapu iti pannakaiparit ti POGO.
