Iggem itan iti Bureau of Customs dagiti amin a 28 Discaya-linked luxury vehicles kalpasan nga insurrender ti nasao a pamilya ti nabatbati a 16 units idi laeng kalman.
Karaman kadagiti naisurrender ti Mercedes Benz GLE, Land Rover Range Rover LWB, Land Rover Defender, Cadillac Escalade ESV, Ford Bronco, Mercedes Benz GLS 350, BMW X5 30d, Jaguar F-Pace 2.0D, Porsche Cayenne V6, Volvo XC90, Mercedes Benz Avant, Land Rover Range Rover Evoque, Mercedes Benz Sprinter, ATV Quicksand, GMC Yukon Denali, ken maysa nga ATV Gray.
Maipalagip nga immunan a narekober dagiti 12 idi laeng Martes kalpasan ti naipatungpal a search operation.
Iti agdama, amin dagiti 28 a luxury cars ket selyadon iti Bureau of Customs ken banbantayan daytoy dagiti personnel da ken dagiti kameng iti Philippine Coast Guard (PCG).
Impeksa met ni Commissioner Ariel F. Nepomuceno a ti panagtulnog dagiti Discaya ket maysa a napateg nga addang para iti imbestigasyon seknan ti panakaimport dagiti nasao a lugan mainaig metlaeng iti isyu dagiti flood control projects.
Mainaig iti dayta, impanamnama ti Bureau of Customs a saanda a palusuten dagiti dealers a maduktalan a kakuntsaba ti pamilya Discaya mainaig iti sangsangwen daytoy nga isyu seknan iti koleksyon dagiti luxury cars.
Sigun kenni Nepomuceno, ipaayanda iti kaskenan a pannusa dagiti responsable iti daytoy nu maduktalan ken mapaneknekan a saan a nagdalan iti umno a proseso dagiti luxury cars sakbay a naiserrek iti pagilian.
Maipalagip a kabayatan ti panakidar-ay ni Sara Discaya iti panagdengngeg iti Senate Blue Ribbon Committee, kinunana a dagiti luxury carsda ket innalada kadagiti dealer.
