Opisyalen a naiyuswat ti 29th Panagbenga wenno ti Flower Festival iti siudad ti Baguio iti Baguio City Hall Grounds ita nga aldaw.
Addaan daytoy iti tema a Blossoms beyond boundaries no sadino mangrugi ti grand opening day parade inton Pebrero uno ken agbayag daytoy agingga inton Marso a dos.
Nakipasetan met daytoy dagiti nagduduma nga opisyal iti siudad pakairamanan da Baguio City Benjamin Magalong, ken dadduma pay.
Kagiddan dayta, nairruar metten dagiti aktibidad para iti daytoy no sadino naituding ti Landscaping competition ken exhibition kasta metten ti Baguio Blooms a market encounter a mangrugi metlaeng inton Pebrero a uno agingga Marso a dos.
Naituding met ti Handog ng Panagbenga sa Pamilya Baguio inton Pebrero nuebe, bayat a ti PMA grand alumni homecoming ket mangrugi inton Pebrero trese agingga Pebrero kinse.
Maangay metlaeng inton Pebrero kinse ti Floral Bouquet design competition, dish garden competition ken ti rhytm of the highlands wenno ti panangipabuya kadagiti cultural dance.
Inton Pebrero dise otso met ket maangay ti 120th founding anniversary celebration ti Baguio Country Club.
Ti met grand street parade ket naituding inton Pebrero baente dos bayat a ti Grand floral float parade ket naituding inton Pebrero baente tres.
Malaksid iti dayta, naituding metlaeng ti session road in bloom inton Pebrero baente kwatro agingga Marso a dos,Fluvial parade inton Pebrero baente syete ken dadduma pay nga aktibidad.
Kabayatanna, maipalagip a daytoy kuma ti maikatallo pulo a tawen a panangrambak iti nasao a festival ngem napasamak ti COVID-19 rason a naitantan daytoy.
