BAGUIO CITY – Simmuko iti gobyerno ti tallo a kameng ti rebelde a New People’s Army (NPA) nga addaan operasyon iti Mountain Province, Ilocos Sur, Abra ken Kalinga.
Insuko metlaeng dagitoy ti dua a yunit ti M1 US Caliber 30 carbine rifles.
Sigun kenni alyas Ka Jimmy, na-rekrut ken nadoktrinaan daytoy iti NPA idi agtawen ti 12 idi 2012 no sadino, naipasidong pay daytoy iti panagsanay iti pampabettak ken iti NPA Advance Training Course agingga a naipasungalngal iti nagduduma a rinnupak iti tropa ti gobyerno.
Nagserbi pay ni Ka Jimmy kas political officer ken nagsubli iti komunidad tapnu agrekrut met kadagiti agtutubo para iti NPA.
Nupay kasta, kinunana a kabayatan ti kaaddana iti komunidad ket ditoy a naamuanna dagiti programa ti gobyerno para kadagiti sumuksuko a rebelde.
Imbingay met ni alyas Ka Alice a 20-anyos daytoy idi naawis a makisalip iti Mountain Province Youth Alliance idi 2018 agingga a nadoktrinaan ken nakikappeng iti rebelde a grupo ken nagserbi kas Assistance Medic and Logistic Officer ti NPA.
Arapaapna ti agbalin a pulis ngem nadadael kalpasan a nakikappeng iti rebelde nga NPA.
Narekrut met ni Ka Benjie iti rebelde a grupo babaen iti Cordillera Peoples Alliance idi 2007 bayat a maysa daytoy a drop out iti high school.
Kinunana a naawis daytoy gaputa naidiayaan iti libre nga edukasyon.
Nagserbi ni Ka Benjie a political instructor ti NPA a taga-rekrut kadagiti saan a nakaadal nga agtutubo nga agnanaed kadagiti nasusulinek a lugar ti Mountain Province ken Kalinga tapnu agnumarda iti libre nga edukasyon.
Nupay kasta, kabayatan ti kaaddana iti komunidad ket ditoy a naamuanna kadagiti pulis dagiti programa ti gobyerno para kadagiti sumuksuko a rebelde a rason iti panagsukona met.
Mangnamnama dagiti tallo nga agserbi nga adal kadagiti agtutubo ti kapadasan wenno istoryada tapnu saan a maallukoy dagitoy ken saanda a matnag iti palab-og ti NPA ken saan a madadael ti napintas a masakbayan dagitoy.
Maipaspasidong metten dagiti tallo iti kaskenan a proseso para iti panakaipaay ti benipisyo nga it-ited ti gobyerno kadagiti sumuksuko a kameng ti rebelde ken dagiti militia ng bayan wenno dagiti mangsupsuportar kadagiti rebelde.
