BAGUIO CITY – Maipasidong iti total lockdown ti tallo a munisipio ti Mountain Province iti tunggal aldaw ti Sabado ken Dominggo gapu iti epekto ti coronavirus disease.
Maibasar kadagiti naipaulog a pammilin, maipasidong iti tunggal lockdown ti Sabangan, Bauko ken Tadian tunggal Sabado ken Dominggo.
Maipasidong met laeng dagiti nasao nga ili iti ordinario a lockdown manipud alas otso ti rabii aginggat alas otso ti agsapa manipud Lunes aginggat Biernes.
Nupay kasta, mabalin a maipaayan iti konsiderasion dagiti residente no makapasar dagitoy iti emergency situation.
Kabayatanna, siraragsak nga inpakaammo ti Mountain Province DRRM Office nga amin dagiti swab samples a naala iti probinsia ket negatibo iti coronavirus.
Karaman kadagiti nagnegatibo ti maysa nga ubing nga agtawen iti dua manipud Besao, ti ubing nga agtawen iti sangapulo manipud Sadanga, ti agtawen iti 16 manipud Natonin ken ti maysa a dialysis patient manipud Bauko.
Mainaig iti daytoy ket inpaulog ni Bauko Mayor Abraham B. Akilit ti executive order a mangiparparit iti iseserrek sadiay Bauko dagiti non-essential travellers iti amin a borders ti munispio.
Maiparit metten a makakstrek iti munisipio dagiti residente ti Bauko nga stranded iti sabali a lugar.
