Nangisayangkat ti Baguio City Police Office (BCPO) Station 1 iti inspeksyon ita nga aldaw idiay Baguio City Public Cemetery.
Indauloan daytoy ni Police Colonel Nixon Laruan Laoyan, City Director ti Baguio City Police Office.
Naisayangkat ti nasao nga aktibidad tapno mamonitor ti kinatalged ken nasayaat a panagsagana ti sementeryo para iti umadani nga pangobserbar iti Undas 2026.
Sigun kenni BCPO City Director Police Colonel Laoyan, manamnama a maideploy iti agarup 117 a kapulisan nga agbantay iti Baguio City Public Cementery no sadino karaman ditoyen dagiti traffic enforcers, traffic PNP personnel, dagiti agtalinaed kadagiti police hubs, ken iti uneg iti sementeryo.
Mangrugi metten ti full deployment dagitoy inton Sabado, Octobre 31 iti alas singko ti agsapa.
Iti sabali a bangir, nagpallagip ni City Director Laoyan iti publiko kadagiti maiparit a maiyuneg iti sementeryo kas iti paltog, bladed weapons ken gardening tools gapu ta nalpas metten iti dayta nga aldaw ti naituding a panagdalus kadagiti sementeryo. Maipawil metlaeng ti panangiyuneg kadagiti takaren nga ayup.
Innayonna pay a maiparit dagiti arak, sigarilyo, ken nainget nga iparparit dagitoy iti agpatayab dagiti saranggola ken nangnangruna a maiparit iti panagaramat iti drone iti sementeryo.
Kabayatanna, ginuyugoyna met ti publiko a sumurot kadagiti pagaladanan tapno masigurado ti natalged a panagbisita iti sementeryo. //via Bombo Khey Reparip
