Impasigurado ti Office of the Civil Defense-Cordillera a nakasagana dagiti ahensya ti gobyerno a mangipaay iti tulong ken suporta kadagiti komunidad a posible a maapektaran iti epekto ti very strong El Niño iti rehion.
Sigun kenni Ariane Christie Atolba, Civil Defense Officer II manipud Operations Section iti Office of the Civil Defense-CAR, nakasagana dagiti ahensya a mangipaay iti a tulong, nangruna kadagiti lokal a gobierno a mangideklara iti State of Calamity gapu iti epekto ti El Niño nangruna ta masapul ti panagsagana dagiti lokal a gobierno tapno maipasigurado a dagus a maipaay dagiti kasapulan dagiti residente a maapektaran iti panagkurang ti danum, pannakalugi dagiti mula ken dadduma pay a posible nga epekto ti napaut a tikag.
Maipalagip a dua kadagiti munisipyo iti Cordillera ti nangideklara iti State of Calamity gapu iti epekto ti El Niño, a pakairamanan ti Paracelis idiay Mountain Province ken Pudtol idiay Apayao kas nailanad iti datos ti National Disaster Risk Reduction and Management Council.
Inlawlawag ni Atolba a ti pannakideklara iti maysa a lugar kas State of Calamity ket maysa kadagiti mekanismo tapno maipaay ti dagus a tulong kadagiti residente a naapektaran, ken tapno mausar ti nakaisagana a pondo para iti relief ken recovery operations.
Mabalin metlaeng a maaramat ti Quick Response Fund wenno QRF manipud iti Local Disaster Risk Reduction and Management Fund ti lokal a gobierno, babaen kadagiti maiparbeng a proseso ken pannakaaprubar.
Sigun iti Republic Act 10121 wenno Philippine Disaster Risk Reduction and Management Act of 2010, 30 percent ti Local Disaster Risk Reduction and Management Fund ti mabukel para iti Quick Response Fund kas pangsuporta kadagiti relief ken recovery programs kadagiti komunidad a naapektaran iti didigra wenno kalamidad.
Nupay kasta, inlawlawag ti opisyal a saan laeng a panangideklara iti State of Calamity ti masapul a pagtalinaeden dagiti lokal a gobierno, nu di ket ti panangipatungpal kadagiti umno a programa ken interbension tapno maliklikan wenno mapabassit ti epekto ti El Niño kadagiti masakupanda. // via Bombo Khey Reparip











