![](https://img.bomboradyo.com/baguio/2020/09/digital-e-learning-resource-project.jpg)
BAGUIO CITY – Napili ti tallo a parapubliko a pagadalan ditoy Baguio City para iti pilot test ti maysa a digital e-learning resource project a pinunduan ti maysa a foundation para iti panakaipaay dagiti supplemental materials para iti science, math ken reading.
Sagudayen daytoy ti iti Memorandum of Understanding a pinirmaan ti Baguio LGU, DepEd-Baguio ken ti Kilusang Kabataan Livelihood Foundation (KKLF) a maysa nga advocacy group a mangtuttutuk iti panakaited ti tulong kadagiti marginalized ken displaced Muslim children para iti nasao a digital learning resource project.
Sigun kenni KKLF chair Kristin Bangot, agdonar ti foundation dagitoy iti learning materials a kapada dagiti maar-aramat iti international schools tapnu maipaayan iti de-kalidad nga edukasyon dagiti benipisaryo.
Agserbi a pilot schools ti proyekto ti Baguio Central School, Apolinario Mabini Elementary School ken ti Pines City National High School.
Agnumar iti donasyon dagiti 50 nga estudyante iti tunggal maysa kadagiti nasao a pagadalan.
Linawlawagan met ni Bangot a saan laeng a dagiti agtutubo a Muslim ti agnumar iti donasyonda ngem ketdi, uray pay dagiti dadduma nga estudyante.
Nangidonar met ni Mayor Benjamin Magalong iti 10 a computers kadagiti pilot schools kas panangsuportar ti LGU iti nasao a proyekto.