BAGUIO CITY – Maipasungalngal ti tallo a Team Lakay fighters iti blockbuster event nga ONE: Inside the Matrix III a maangay sadiay Singapore inton November 13 a pakaitampokan dagiti world-class martial artists.
Maibasar iti waragawag ti ONE Championship, agserbi a main event ti bantamweight fight wenno ti panangsango ni sigud a ONE Bantamweight World Champion ken No. 1-ranked contender Kevin ‘The Silencer’ Belingon ken ni No. 5-ranked John ‘Hands of Stone’ Lineker ti Brazil.
Immuna a nagun-od ti 33-anyos nga Igorot MMA fighter ti ONE Interim Bantamweight World Title idi July 2018 ken inabakna ni longtime bantamweight titleholder Bibiano Fernandes para iti panagbalinna kas undisputed ONE Bantamweight World Champion.
Nupay kasta, napaay daytoy iti maikatlo ken maikapat a panagsangoda kenni Fernandes.
Puntirya ni Belingon a maragpat ita ti maika-21 a pangabak iti rekordna.
Kabayatanna, agserbi met a co-main event ti laban da sigud nga ONE Flyweight World Champion Geje ‘Gravity’ Eustaquio ken Song Min Jong ti South Korea iti catch weight division.
Naudi a limmaban iti octagon ni Eustaquio idi November 2019 idi inabakna ti longtime rival-na a ni Toni ‘Dynamite’ Tauru.
Mabuya pay iti fight card ti laban da No. 5-ranked strawweight contender Lito ‘Thunder Kid’ Adiwang ken Hiroba Minowa ti Japan.
