NATONIN, MT. PROVINCE – Agladladingit dagiti pamilya ken maseknan nga indibidual iti ipupusay ti 3-anyos nga ubing idiay Sitio Batnong, Barangay Banawel, Mountain Province idi May 24, 2026.
Agkikiddaw metlaeng dagitoy ti tulong manipud iti publiko para iti anyaman nga impormasion a makatulong iti imbestigasion.
Iti report ti Natonin Municipal Police Station, nasarakan ti biktima iti likudan ti St. Martin de Porres Chapel idiay Sitio Batnong, Banawel, Natonin, Mountain Province.
Dagus a naitaray iti Anastacia Rafael Sagel Memorial Hospital idiay Poblacion, Natonin, Mountain Province ngem indeklara ti attending physician a ni Dra. Dr. Mari rose Tocuboy a pimmusay gapu iti traumatic brain injury.
Maibasar iti inisyal nga imbestigasion dagiti otoridad, nagbakasion ti biktima idiay Natonin ken dimmar-ay kaduana ti lolana iti Barangay Amamong a naangay iti Banawel Elementary School idiay Sitio Batnong, Banawel, Natonin.
Pasado 2:00 p.m idi May 23, 2026 idi binirok ti lolana idi nadlawna nga awan ti apona iti nasao a lugar.
Nagdamag kadagiti sumagmamano nga indibidual ngem saanda latta a masarakan ti ubing.
Pasado 3:00 p.m, nagtitinnulong dagiti pamilya ken dagiti maseknan a residente iti panangbirok iti biktima, partikular iti masakupan ti pagadalan ken iti kaasitgan a lugar ngem saanda a nasarakan.
Gapu iti dayta, pasado 5:00 p.m iti kapada nga aldaw, in-report ti lola ti biktima ti napasamak nga insidente iti police station.
Dagus a nangisayangkat dagiti personnels ti Natonin MPS ken Natonin BFP iti search operation agingga iti 2:00 a.m ti May 24, 2026.
Pasado 7:30 a.m ti May 24, nasarakan ti biktima babaen iti lolo na.
Nabirukan ti biktima nga awanan puot iti likudan ti St. Martin de Porres Chapel idiay Sitio Batnong, Natonin, Mountain Province.
Iti eksklusibo a pannakiuman ti Bombo Radyo kenni Police Captain Bea Pulao ti Natonin MPS, maisidong iti autopsy ti bangkay ti biktima tapno maamuan ti pudno a rason ti ipupusay daytoy.
Iti agdama, agtultuloy ti imbestigasion dagiti otoridad iti napasamak nga insidente.//mp4
