BAGUIO CITY – Nakemmeg ti tallo a drug personalities iti impatungpal ti PDEA-Cordillera ken Baguio City Police Office Station 2 a drug buy-bust operation sadiay Purok 2, Pinsao Pilot, Baguio City idi rabii.
Nabigbig dagitoy a da Akiya Velasco aka Aki, 20 anyos; Kimberly Felix aka Kim, 20 anyos kenni Chris John Quitoriano aka Katiting, 24 anyos ken bin-ig a residente ti Purok 2, Pinsao Pilot, Baguio City.
Nakumpiskar manipud kadagiti suspek ti maysa a brown paper envelope a naglaon ti maysa a sachet ti maatap a shabu nga agdagsen ti mapattapatta a lima a gramo, maysa a pidaso ti genuine 1000 peso bill, ken 14 a pidaso ti sangaribo a pisos a boodle money.
Naamuan a da Velasco ken Felix ket drug surrenderers.
Kabayatanna, nakemmeg met ti maysa a gangannaet iti drug buy-bust operation ti PDEA-Cordillera sadiay Padre Zamora Barangay idi rabii.
Nabigbig daytoy a ni Kumar Lakhvir, 38 anyos, tubo ti India ken agnanaed sadiay Siapno Road, Pacdal, siudad ti Baguio.
Nakumpiskar kenkuana ti dua a sachet a naglaon iti maatap a shabu, dua a pidaso ti genuine 500 peso bill, sangaribo a pisos a boodle money ken maysa a cellphone.
Sumangsango dagiti uppat nga indibidual iti panaglabsing iti Comprehensive Dangerous Drugs Act of 2002.
