![](https://img.bomboradyo.com/baguio/2020/08/marijuana-buy-bust-kalinga.jpg)
BAGUIO CITY – Nakemmeg ti tallo nga indibidual iti buy-bust operation nga insayangkat dagiti otoridad iti kalsada iti sangwanan ti maysa a simbaan sadiay Bulanao Centro, Tabuk City, Kalinga idi kalman.
Nabigbig dagitoy a da Mercedes Macaiba, Julius Bagtang ken Gilbert Bagtang a bin-ig a tubo ti Tinglayan, Kalinga.
Nakumpiskar manipud kadakuada ti 31 a marijuana bricks ken 10 a tubular marijuana nga agdagsen ti 41 a kilos ken nga aggatad ti mapattapatta iti P5-M.
Narekober kadagitoy ti naaramat a buy-bust money.
Kinumpiskar pay dagiti otoridad ti tricycle ken motorsiklo nga inaramat dagiti tallo a nakitransaksion iti operatiba.
Sumangsango metten dagitoy iti kaso a panaglabsing iti RA 9165 wenno ti Comprehensive Dangerous Drugs Act of 2002.,
Iti interview ti Bombo Radyo Baguio kenni PCol. Davy Vicente Limmong, kinunana a nabayagen a binanbantayan dagiti otoridad dagiti nakemmeg a tallo gapu iti nabayag a panagilaklako dagitoy iti iligal a droga.
Dinakamatna metlaeng a posible a marijuana cultivators dagiti nakemmeg nga indibidual.
![](https://img.bomboradyo.com/baguio/2020/08/marijuana-buy-bust-kalinga-2.jpg)
![](https://img.bomboradyo.com/baguio/2020/08/marijuana-buy-bust-kalinga-3.jpg)