BAGUIO CITY – Simmuko dagiti tallo a rebelde a kameng ti New People’s Army (NPA) iti 81st Infantry Battalion-Philippine Army sadiay Sta. Cruz, Ilocos Sur.
Sigun kenni Army Lt. Col. Eugenio Osias, resulta daytoy ti agtultuloy a kampanya ti militar para iti panakaisigurado ti kinatalged ti Northern Luzon manipud kadagiti komunista a rebelde.
Binigbigna ti immuna a ni “Ka Winter” a miyembro ti Kilusang Larangan Gerilya “Montes” ti Ilocos-Cordillera Regional Committee ti CPP-NPA nga addaan operasyon iti boundaries ti Abra, Mountain Province ken Ilocos Sur.
Simmaruno a simmuko da “Ka Somer” a logistics officer ken miyembro ti Squad Uno ken ni “Ka Paul” nga squad leader ti Squad Tres manipud iti Kilusang Larangan Gerilya “Marco” nga addaan operasyon iti Mt. Province.
Insuko dagitoy ti mays a U.S. Caliber 30 Springfield M1 Garand Rifle, tallo a bala, maysa a Cal. 45 Norinco ken maysa nga U.S. Caliber 30 Browning Automatic Rifle.
Kinuna dagitoy a ti kinarigat iti biag iti bantay, ti presensia ti militar ken ti programa ti gobyerno para kadagiti rebel surrenderees ti nangitunda iti panagsuko dagitoy.-gb
Gapu iti daytoy ket guyguyuguyen ti militar ti panagsuko dagiti rebelde tapnu makanumar dagitoy kadagiti programa nga ididiaya ti gobyerno.
