BAGUIO CITY- Nangrugin ti implementasyon ti 3 minute response time ti Baguio City Police Office, kasaruno daytoy ti impaulog ni PNP Chief Gen. Nicolas Torre III a baro direktiba.
Ti 3 minutes response time ket oras ti panagresponde dagiti otoridad manipud iti emergency call a naawatda babaen iti teknolohiya.
Impeksa ni PCol. Ruel Tagel , City Director ti Baguio City Police Office a babaen iti baro a direktiba ket maipakita ti panakapasayaat ti serbisyo dagitoy iti publiko.
Kinunana pay a ti 3 mins. response ket saan laeng a maipapan iti napartak a panagresponde nu diket panggep metlaeng daytoy ti panagbalin a responsive dagiti kameng ti Pulisya.
Kabayatanna, imbinglay ti nasao nga opisyal nga adda ti daily deployment plan dagitoy kas iti checkpoint, panagpatrolya babaen iti foot, mobile patrol ken daduma pay.
Impeksa ni PCol. Tagel a posible a maragpat ken maimplementarda ti 3 minutes response time.
Immunan nga impeksa ti City Director a maadal dagiti lugar a kadawyan a pakapaspasamakan ti aksidente tapno ditoy a maideploy dagiti personnels.
Karaman a pakairawarsan dagiti personnel ti City Police Office dagiti convergence area, intersection area ken daduma pay.
Mainaig ti dayta, manamnama a maingetan ti communication system dagitoy a maysa kadagiti programa ni PNP Chief Gen. Nicolas Torre III.
Maipalagip a ti communication system ket ti panagaramatda iti zello a maysa nga inter based communication malaksid ti handheld radio dagitoy.
Malaksid kadagitoy, maad-adal metlaeng ti naparpartak a komunikasion kadagiti panagresponde dagitoy.//Bombo Noveh Organo
