BAGUIO CITY – Umap-apela iti suporta ken pinansyal a tulong ti tallo nga estudyante ti sekondarya manipud Benguet a makipaset iti Jincheon 1st World Youth Martial Arts Mastership a maangay sadiay South Korea inton Nobyembre 3 agingga 7.
Segun kenni Rosemarie Recto manipud iti Sablan National High School a makipaset iti 51 kgs division ti muay thai, igidgiddanda ti panagensayo dagitoy iti panagadalda tapnu mangabak iti nasao a kompetisyon.
Nupay kasta, kinunana a parikotda ita ti panggatang iti plane ticket a paturong sadiay South Korea isut gapuna nga umap-apelada iti tulong dagiti maseknan.
Kinunana nga anyaman a tulong ket subadanda iti panangabakda iti pasetanda a pasalip.
Malaksid kenni Recto ket makipaset met laeng da Felix Dave Cantores ti Sablan National High School iti 57 kgs division ken ni Islay Erika Bomogao ti Benguet State University iti 45 kgs division.
Ti nasao a kompetisyon ket manamnama a paseten ti nasurok 600 nga atleta manipud iti 30 a pagilian.
