BAGUIO CITY – Napadayawan ti tallo nga Igorot Special Action Force (SAF) troopers a pimmusay iti nagan ti serbisyo kabayatan ti SAF memorial day iti SAF headquarters sadiay Camp Bagong Diwa, Taguig City idi kalman.
Naipaay ti traditional ringing of bells kada PO1 Moises Kimayong Jr. ken PO3 Alexis Mangaldan nga agpada a pimmusay iti rinnupak sadiay Marawi City, ken ni PO2 Tirso Mantalaba kabayatan ti anti-drug raid sadiay Sulu.
Maipalagip a makisansanay kadagiti scout rangers ni Kimayong ken kabayatan ti test mission, naipatulod ti ranger class dagitoy tapnu tumulong iti puersa ti gobyerno sadiay Marawi.
Nupay kasta, idi Hulyo 25 ket napuntaan ti ulo ken barukong ni Kimayong kabayatan ti panagturongda iti “building 572″ ti nasao a siudad.
Dua nga aldaw sakbay ti ipupusay ni Kimayong ket napapatay ni Mangaldan kabayatan ti panakirinnupakda kadagiti miembro ti Maute iti clearing operation sadiay Barangay Lilod Proper.
Kabayatanna, ni Mantalaba ket maysa kadagiti elite policemen a pimmusay iti nagan ti drug war ti Duterte administration.
Karaman ni Mantalaba kadagiti nangipaay iti tactical support iti operatiba ti Patikul municipal police station a nangraut iti kuta ti maatap a drug trafficker a ni Annudin Akiran Daharani sadiay Patikul, Sulu.
Idi nakagtengda iti nasao a lugar ket pinalpaltogan dagitoy ni Darahani a nakatiroan ti barukong ni Mantalaba, ken naitaray daytoy iti ospital ngem naideklara a pimmusay.
