BAGUIO CITY – Nakailista latta ti Department of Health (DOH) – Cordillera iti firecracker-related incidents iti baet ti nainget a kampanyada para iti saan a panagaramat kadagiti paputok ken palibang ditoy rehion.
Iti panakipatang ti Bombo Radyo kenni Clark Dizon, Nurse IV ken Emergency Management Coordinator ti DOH-Cordillera, nakailistada iti tallo a nabiktima iti paputok iti dua a probinsia iti rehion.
Kinunana a maysa a menor-de-edad ti naputukan iti piccolo sadiay Ifugao bayat a maysa met a menor-de-edad ti naputukan iti improvised toy gun ken maysa nga Army trooper ti naputukan iti pla-pla sadiay Kalinga.
Naamuan a tallo nga aldaw sakbay ti aldaw ti Paskua ket nadangran ti kanawan nga ima ni Wilmer Ollier Elardo, 9-anyos manipud Busilac, Alfonso Lista, Ifugao kalpasan a sinindianna ti maysa a piccolo a dagus a pimtuk.
Naiturong iti pagagasan ni Ranier Lumpio Gamongan, 9-anyos manipud Bulanao, Tabuk kalpasan nga aksidente a pinaputokna ti maysa nga improvised toy gun a naglaon ti pulbura.
Dinakamatna a nadangran ti kanawan a tangan ni Private First Class Ian Canapang, 26-anyos manipud Poblacion, Tanudan, Kalinga idi sinindian daytoy ti maysa a pla-pla idinto ta a nabartek daytoy.
Kagiddan iti daytoy ket naminsan manen a nagpalagip ti DOH-Cordillera iti publiko a no maputukan dagitoy ket saanda nga agasan ti nagduduma a banag.
Kinunana a dagus a dalusan ti sugat iti nalinis a danum sakbayda nga agturong iti pagagasan para iti umno a panakataming dagitoy.
