BAGUIO CITY – Agpapaimbag iti Baguio General Hospital and Medical Center ti tallo nga indibidual a nadangran kalpasan a dinungpar ti maysa a kotse ti naglugananda a motorsiklo sadiay Marcos Highway, Inonas, Taloy Sur, Tuba, Benguet idi rabii.
Nabigbig dagitoy a da Jilmer Locloc, 24, driver ti motorsiklo, ken dagiti backriders daytoy a da Edward Pitlongay Locloc, 32, ken ni Valentine Taplin Ernesto, 31, a bin-ig a residente ti Bawek, Taloy Sur, Tuba, Benguet.
Maibasar iti imbestigasyon, paturong ditoy siudad ti Baguio ti kotse nga imanmaneho ni Jackie Lou Obra De Guzman, 32, residente ti Bakakeng, Baguio City idi linumbaanna ti nabuntog a truck.
Nupay kasta, daytoy ti nangitunda iti panangdungparna iti motorsiklo a nagluganan dagiti biktima.
Gapu iti daytoy, nagsagrap ni Jilmer Locloc iti head injury bayat a dagiti backriders daytoy ket nagsagrap iti dunor iti saka dagitoy.
Naamuan a saan a nakasuot dagiti biktima iti helmet idi napasamak ti nasao nga aksidente.
