Nakemmeg ti 3 nga indibidual idiay Purok 14, Irisan, Baguio City bayat a nakataray dagiti dadduma a kakadua dagitoy gapu iti panaglabsingda ti P.D. 1602 wenno illegal gambling.
Iti report ti kapulisan, dagiti naarestar ket ti lalaki nga agtawen ti 40, single, maysa a vendor ken residente ti Cypress, Irisan, Baguio City; 33-anyos a babae, vendor ken residente ti nakapasamakan ti insidente ken 31-anyos, vendor metlaeng, residente ti UP Villlage, Purok 14, Irisan, Baguio City.
Iti inisial nga imbestigasyon ti kapulisan, nakaawat ti awag dagiti kapulisan manipud ti maysa a concerned citizen seknan iti mapaspasamak nga illegal gambling iti nasao a lugar wenno pagtaengan.
Dagus a binerepikar daytoy ti kapulisan nu sadinno apaman a nakadteng dagitoy ket naaktuanda dagiti suspek a madama nga agay-ayam ti pusoy wenno braha.
Nakatakaray dagiti dadduma bayat a dagiti tallo ket natiliw.
Nakumpiskar manipud kadakuada ti maysa a set ti braha ken bet money a dumanon ti 2,850.00.
Dagiti suspek ken nakumpiskar nga ebidensya ket naiturong ti istasion ti pulisya para ti umno a dokumentasyon .
Maisagsagana metten dagiti kaskenan a dokumento para ti pannakaipila ti kaso kontra kadagiti nakemmeg a suspek.| via Bombo Noveh Organo
