BAGUIO CITY – Nakemmeg ti tallo nga indibidual a bukbuklen ti maysa a sigud a pulis, maysa a miembro ti local drug group ken maysa a napeklan a drug pusher iti nagsisina nga anti-drug operations ti Philippine Drug Enforcement Agency ditoy siudad ti Baguio idi kalman.
Kinemmeg ti Benguet Special Enforcement Unit ti PDEA-Cordillera ti napeklan a drug pusher a nabigbig a ni Dennis Joel Paraguas, 52-anyos ken residente ti Scout Barrio.
Nakumpiskar kenkuana ti maysa a sachet a naglaon ti mapapati a shabu nga agdagsen iti agarup nasurok 0.22 grams nga aggatad ti nasurok P1,000.
Simmaruno a nakemmeg ni Michael Rebollido Balcita a.ka.a Mike Balcita, 37-anyos ken residente ti Quirino Hill gapu iti panangilakona iti maysa a sachet ti mapapati a shabu nga agdagsen iti agarup nasurok 2.5 grams nga aggatad ti P12,500.
Kabayatanna, kinemmeg met dagiti kameng ti Baguio City Special Enforcement Unit ti PDEA-Cordillera ti sigud a kameng ti pulisya a nabigbig a ni Carlos Salviejo Lagayan a.k.a Mang-C, 69-anyos, awanan trabaho ken residente ti Slaughter Compound.
Nakumpiskar kenkuana ti dua a sachets ti mapapati a shabu nga agdagsen iti agarup nasurok 5 grams nga aggatad ti P20,000 malaksid a narekober iti bulsana ti uppat a sachets ti mapapati a shabu nga agdagsen iti agarup nasurok 6 grams nga aggatad ti P25,000.
Naamuan a ni Lagayan ket sigud nga SPO4 ngem naikkat iti serbisyo kalpasan a nakumbiktar gapu iti kaso daytoy a panagilako ken panag-imet iti iligal a droga.
Sumangsango ita dagiti suspek iti kaso a panaglabsing iti Comprehensive Dangerous Drug Act of 2002.
