Sumangsango iti nagduduma a panaglabsing iti linteg karaman dagiti agdama nga ordinansa iti siudad ti Baguio dagiti tallo nga stall owners/operator idiay Bakakeng Central ken Marcos Highway, Baguio City idi laeng Agosto 26.
Maibasar iti report ti pulisya, nagturong iti istasion ti 53-anyo a babai, maysa nga Animal Product Inspector iti City and Veterinary and Agriculture Office tapno mairekord dagiti nakumpiskar a meat products ken panaglabsing.
Iti report, agarup 21.1 a kilo iti karne ti baboy ken manok ken 17 a kilo ti assorted fish products ti nakumpiskar manipod iti maysa a General Merchandise idiay Bakakeng Central.
Idiay Marcos Highway, nakumpiskar met ti 30.05 a kilo iti chilled chicken, bayat nga idiay Alab Junction iti Marcos Highway, Baguio City ket nakumpiskar ti agarup 3 a kilo iti entrails iti maysa metlaeng nga store.
Amin dagitoy ket sumangsango iti panaglabsing iti R.A. 9296 kas naamyendaran iti RA 10536 wenno ti “The Meat Inspection Code of the Philippines”; R.A. 10611 wenno ti Food Safety Act of 2013; R.A. 7394 wenno ti Consumer Act of the Philippines ken dadduma pay a panaglabsing iti linteg.
Dagiti karne a nakumpiskar a karne ken lames ket naiturong iti opisina iti CVAO para iti umno a pannakaibelleng dagitoy. |via Bombo Noveh Organo
