BAGUIO CITY – Agsagsaganan ti lokal a gobyerno ti Baguio para iti panaggatangda iti Ultra Low Temperature Freezers a maaramat iti kanito nga addan ti magatang a bakuna kontra iti COVID-19 inton sumaruno a tawen.
Sigun kenni Mayor Benjamin Magalong, kasapulanen ti panaggatang ti nasao a freezer tapnu maipanamnama ti kaadda ti cold chain logistics ti siudad iti kanito a mabakunaanen dagiti umili.
Dinakamatna a puntiryada a makagatang ti tallo a nagduduma a klase ti Ultra Low Temperature Freezers, pakairamanan ti freezer a makadanun iti -40°C agginga -80°C a pakaidulinan dagiti magatang a bakuna kontra iti COVID-19.
Inlawlawagna a babaen iti daytoy ket agtalinaed nga epektibo dagiti magatang a bakuna.
Innayon pay ni Mayor Magalong nga agisaganada ti Cold Chain Facility a pakaisayangkatan ti panagbakuna nangruna ta saan a basta-basta ti panangibakuna kadagiti bakuna kontra iti COVID-19.
Dinakamatna a nasken nga agpada a nababa ti temperatura ti aglawlaw ti bakuna ken ti tao a pakaibakunaan daytoy. (report ni Bombo Charles Nikko Limon)
