BAGUIO CITY – Agtaltalinaed iti Baguio General Hospital and Medical Center (BGHMC) dagiti tallo a pasahero ti bus ti Development Bank of the Philippines a naaksidente sadiay Badiwan, Poblacion, Tuba, Benguet idi agsapa.
Nabigbig dagitoy a da Andrew del Rosario a residente ti Muntinlupa, Jerome Mag-oto a residente ti Pasig City kenni Johny Baltome a residente ti Quezon City.
Sigun iti BGHMC, daytoy ket gapu iti nasagrap dagiti tattao a fracture wenno dunor iti paset ti bagida.
Immuna iti daytoy, naitaray iti pagagasan ti 31 a nadangran pakairamanan ti driber ken ti mekaniko ti bus manipud kadagiti 42 a pakabuklan a pasahero ti nasao a bus.
Maipalagip a nagsikig ti bus ti DBP a naglaon iti 41 nga empleyado ti nasao a bangko kalpasan a naawanan ti preno bayat ti panagsalog daytoy paturong sadiay lowland manipud Mines View, Baguio City.
