BAGUIO CITY – Pimmusay ti tallo nga indibidual pakairamanan ti dua nga estudyante, bayat a nadangran ti tallopulo ket innem a dadduma pay kalpasan a bimmaliktad ti naglugananda a parapasahero a jeep sadiay Cudal, Tabuk City, Kalinga itay agsapa.
Nabigbig dagiti pimmusay a da Irene Mayaoyao, 40, ken dagiti estudyante a da Vandamme Mayaoyao ken Hero Wakisan, a bin-ig a residente ti Tanudan, Kalinga.
Kabayatanna, nabigbig ti driver ti jeep nga addaan iti plaka nga ADA-388 a ni Ramos Mayaoyao.
Maibasar iti imbestigasyon ti Tabuk City Police Station, napukaw ti kontrol ti driver iti manibela bayat ti panagsalogda iti kalsada sadiay barangay Cudal a nangitunda iti panagbaliktad ti jeep.
Gapu iti daytoy ket naipit ti maysa kadagiti estudyante a pimmusay iti aksidente.
Naitaray met dagiti nadangran iti Kalinga Provincial Hospital ken iti pribado nga ospital.
Iti agdama ket adda iti kustodiya ti Tabuk City Police Station ti driver ken manamnama a maidatagan iti kaso a Reckless Imprudence resulting in multiple homicide ken multiple injuries.
