BAGUIO CITY – Dumanon iti tallo nga indibidual ti pimmusay bayat a maysa ti mapukpukaw sadiay probinsia ti Apayao gapu iti epekto ti dakes a sasaaden ti panawen nga ituntunda ti northeast monsoon wenno amian ken tail end of a cold front manipud pay idi napalabas a lawas.
Iti panakiyuman ti Bombo Radyo kenni Jeoffrey Borromeo, Provincial DRRM Officer ti Apayao, kinunana a pimmusay ni Cresencio Francisco Dimaano Sr., 81-anyos ti Barangay Lappa, Luna kalpasan nga inyanod ti danum iti karayan bayat a pimmusay met ni Arjay Mamaril, 3-anyos ti Barangay Calayucay, Luna kalpasan a nagaburan iti daga kabayatan ti panagbakwitda iti inana.
Pimmusay met ni Mario Parandit, 30-anyos ti Barangay Cadaclan, Calanasan kalpasan nga inyanod ti danum daytoy ken ti amana a ni Galano Parandit a mabirbiruk paylaeng agingga ita.
Kinuna ni Borromeo a naka-red alert latta ti Apayao Provincial DRRM Office gapu iti epekto ti dakes a sasaaden ti panawen sadiay a nangitunda iti panagbakwit ti 94 pamilya wenno 371 indibidual ken nakaapektaran ti nasurok 4,000 pamilya wenno nasurok 14,000 indibidual.
Dumanon met iti 18 a babbalay ti naan-anay a nadadael bayat a 14 a babbalay ti nadadaelan gapu iti panaglayos a napasaran iti lower municipalities ti Apayao manipud pay idi napalabas a Biyernes.
Dinakamatna nga agtultuloy ti panangiwarasda iti relief goods kadagiti kangrunaan a naapektaran a barangay sadiay Apayao kagiddan ti agtultuloy a panagwaknit kadagiti kalkalsada a nangserra kadagiti babbarangay sadiay Luna.
