BAGUIO CITY – Pimmusay ti tallo nga ubbing bayat a nadangran ti 13 a pasahero iti pannakatnag ti maysa a lugan iti hardin sadiay Sitio Naduguan, Baculongan Sur, Buguias, Benguet idi malem kalman.
Nabigbig dagiti pimmusay a da Leo Adel Tullabang, agtawen iti siam; Jay-ar Adel Tullabang, agtawen iti sangapulo ken dagitoy ket agkabsat ket residente ti Bolanao, Tabuk City, Kalinga bayat a ti maysa ket ni Fred Elmer Quinio Bagni, agtawen iti 14 ken residente ti Pozorrubio, Pangasinan.
Ti nasao a lugan ket maysa nga Isuzu Ford Fiera nga addaan iti plaka nga ABF A75 nga inmaneho ni Menargon Wakit Quintos, 50-anyos a residente ti Buguias, Benguet.
Sigun kenni PCI Peter Daplian, hepe ti Buguias PNP, naglaon ti nasao a lugan iti nateng bayat a dagiti pasahero ket naglugan iti tuktok, ken likudan ti lugan ken adda met laeng dagiti nagsabit a pasahero.
Kinunana a bayat ti panagdalyasat ti lugan ket napukawan daytoy iti preno a nangitunda tapnu agdiretso ken natnag iti garden terrace nga addaan kauneg a mapattapatta a sangapulo a metro.
Naideklara a dead on arrival dagiti tallo nga ubbing bayat a naiturong sadiay Lutheran Hospital dagiti nadangran a pasahero ken ti drayber a nagsagrap iti nakaro a dunor ket naiturong iti Luis Hora Memorial Hospital.
Naamuan a dagiti pimmusay nga ubbing ket simmurot laeng kadagiti nagannakda nga apan makitangdan nga agmula sadiay Buguias, Benguet.
