BAGUIO CITY – Maipatungpal ti tradisyonal a reception rites dagiti baro a plebo wenno kadete a mangbukel iti Philippine Military Academy (PMA) Class 2021 ita nga aldaw.
Sigun kenni PMA information officer Lt. Col. Reynaldo Balido, dumanon iti 300 dagiti prospective cadets a bukbuklen dagiti 260 a lallaki ken 40 a babbae.
Kinunana a daytoy ti opisyal a mangmarka iti umuna nga aldaw ti military career ken maudi nga aldaw ti biag dagitoy kas sibilyan.
Agsapata dagiti plebo sakbay a maiparikna kadagitoy ti military training a mapasarandan to iti military academy ken daytoy ket saksian dagiti nagannakda.
Idauluan dagiti upperclass cadets wenno Plebe Detail ti panangbilin kadagiti ehersisyo nga aramiden dagiti plebo kas iti push-up, sit-up, squat thrust, jumping jacks, dash ken dadduma pay a kadawyan nga maaramid iti dua a bulan a panagsanay dagitoy.
Maipasidong dagiti baro a kadete iti summer training wenno Beast Barracks a mangisaganda kadakuada iti panagbalinda a naan-anay a miyembro ti Cadet Corp Armed Forces of the Philippines babaen iti maangay nga incorporation ken recognition ceremonies.
