BAGUIO CITY – Im-imbestigaran ita ti Municipal Environment and Natural Resources Office (MENRO) ti Tuba, Benguet ti pakabigbigan ti nagibelleng iti nadadael a karne ti manok iti maysa a rangtay sadiay Badiwan, Tuba, Benguet.
Sigun kenni Sammy Paquit, dadaulo ti MENRO – Tuba, dumanon iti agarup 33 a karton a naglaon iti nadadael a karne ti manok ti nasarakanda iti nasao a lugar.
Kinunana a nadiskubre daytoy dagiti garbage collectors a dagus a nangibunag iti transfer area ti munisipyo sadiay Badiwan.
Pattapattaenda a naibelleng dagiti nasao a karne idi kalman iti rabii gaputa nadalos pay ti rangtay iti agsapa ti nasao nga aldaw.
Nadakamatna a saanda pay laeng nga ammo no asino dagiti nangibelleng kadagiti nasao a karton ngem natatakan dagiti karton iti “BONUS” ken “SM”.
Gapu iti daytoy, impalagip ni Paquit a maipawil ti pagbasura iti masakupanda a lugar nangruna iti igid dagiti kalkalsada, partikular dagiti national highways.
