Pakabuklan iti 334 nga establisimiento iti siudad ti naipaayan iti sanitary order iti Environmental Health and Sanitation Division iti City Health Services Office (CHSO) manipod iti bulan ti Enero agingga Hulio 2026 gapu iti panaglabsing iti Presidential Decree No. 856 wenno Sanitation Code of the Philippines.
Sigun kenni Sanitation Division Head Albert Pay-an iti report na kenni Mayor Benjamin Magalong, resulta daytoy iti regular inspection tapno maipasigurado ti panagsurot kadagiti pagalagadan iti salun-at ken kinadalus.
Iti pakabuklan a bilang, 166 ti food establishments, 141 ti private water sources, ken 27 ti non-food establishments a naimatangan nga addaan iti panaglabsing.
Idi Hulio laeng, 74 sanitary orders ti naipaulog kadagiti establisimiento a saan a nagtulnog iti naituding a pagalagadan.
Karaman kadagiti kadawyan a panaglabsing iti food establishments ti kinaawan iti health certificate ken personal protective equipment dagiti empleyado, kasta metten iti kontaminado a taraon. Dagitoy ket napasardeng paylaeng ti operasionda agingga a maisayangkat ti kasapulan a panagdalus, pest control, ken dadduma pay a corrective measures.
Kabayatanna, napasardeng ti sumagmamano a water refilling stations ken deep wells gapu iti saan a panangipasa iti bacteriological water quality test, bayat a dagiti salon ken barber shop met ket nababalaw gapu iti kinaawan iti health certificates, saan nga umno a panangibelleng iti basura, ken kinakurang iti kinadalus.
Nagpalagip ni Pay-an kadagiti negosiante nga agtuloy a suroten dagiti pagalagadan iti sanitation tapno masalakniban ti salun-at ken kinatalged iti publiko.
