BAGUIO CITY – Dumanon iti 12,710 nga indibidual wenno 3,379 a pamilya manipud kadagiti 266 a barangay iti rehiyon Cordillera ti naapektaran iti panagdalapos ni Severe Tropical Storm Kristine.
Iti interview ti Bombo Radyo, kinuna ni Frankie Cortez, Chief Operations Section ti Office of the Civil Defense (OCD) – Cordillera, nadadael dagiti 181 a babbalay nu sadino uppat kadagitoy ti totally-damaged ken 177 met ti partially-damaged.
Dinakamatna nga adda pay ti dua a kalsada nga agtaltalinaed a nakarikep agingga iti agdama.
Maibasar metlaeng iti datus ti nasao nga opisina, nasurok P17.5 million a danyos ti nadadael iti sektor ti agrikultura ken nasurok P67 million iti sektor ti imprastraktura iti rehiyon Cordillera.
Iti agdama ket adda paylaeng ti dua nga evacuation centers a nakalukat a mang-ak-akomodar kadagiti walo a pamilya bayat nga adda met ti dua pulo ket lima nga indibidwal ti madama paylaeng a makigkigyan kadagiti am-ammoda wenno kabagyanda.
Malaksid iti dayta, dua metten ti indibidwal a nakumpirmar a pimmusay bayat ti panagdalapos ti bagyo a Kristine.
Iti baet dayta, nakaipaay metten dagiti maseknan nga opisina ti gobyerno iti kaskenan a tulong kadagiti naapektaran a pamilya.//Bombo Vy Organo
