Nadangran ti maysa a lalaki nga agtawen iti 35 ken residente idiay Central Balili, La Trinidad, Benguet kalpasan a nabagsol idi Hulio 5, 2026 iti rabii iti uneg iti Manays Bistro, Cherway Building, Otek Street, Baguio City.
Iti report iti pulisia, ti suspek ket maysa metlaeng a lalaki nga agtawen iti 39 ken residente idiay Pandayan, Tadian, Mountain Province.
Ti insidente ket nasaksian ti lalaki nga agtawen iti 39 a residente iti New Lucban, Baguio City.
Maibasar iti inisial nga imbestigasion dagiti kameng iti pulisia, ti biktima ken ti suspek ket agpada nga adda iti uneg iti nasao nga establisimiento idi napasamak ti insidente.
Naobserbaran a nakainum ti suspek babaen iti nakasaksi.
Bayat a nakatugaw ti biktima iti uneg, kellaat nga immasideg ti suspek ken binagsolna iti right flank a paset ti bagi iti biktima babaen iti balisong.
Dagos a timmaray ti suspek bayat a tinulongan dagiti concerned citizen ti biktima nga iturong iti ospital.
Kinamat met ti nakasaksi ti suspek kasta metlaeng dagiti nagresponde a kameng iti pulisia a nangitunda iti pannakatiliw iti suspek.
Narekober manipud iti suspek ti maysa nga 8.5 inches a nangisit a balisong.
Na-confine ti biktima ket agtultuloy nga agpapaagas daytoy iti pag-agasan.
Kabayatanna, maisagsaganan metten dagiti kaskenan a dokumento para iti pannakaipila ti kaso a serious physical injuries kontra iti suspek.| via Bombo Noveh Organo
