BUGUIAS, BENGUET – Agtultuloy nga im-imbestigaran dagiti awtoridad ti ipupusay ti 36-anyos nga Igorot Rapper a residente ti Deccan, Baculongan Sur, Buguias, Benguet.
Iti exclusive interview ti Bombo Radyo kenni PCapt. Filmore Pasiwen, Chief of Police ti Buguias Municipal Police Station, kinunana a kas maibasar iti inisyal nga imbestigasyon dagitoy ket maatap nga adda ti foul play a napasamak iti ipupusay ti saanen a nainaganan a biktima gapu iti sugat a nakita iti likod ken sango ti rupana.
Sigun pay iti opisyal, agruprupsan ti bangkay ti biktima idi nasarakan daytoy iti canal ti mismo a gardenna.
Iti report ti Buguias Municipal Police Station, nakaawat dagitoy iti impormasyon seknan iti nasarakan a bangkay idiay Deccan, Baculongan Sur, Buguias, Benguet idi Mayo 31, 2026.
Iti interview dagiti awtoridad iti asawa ti biktima, napan daytoy iti gardenda, agsapa ti Mayo 31 tapnu apanna kitaen ti asawana gapu ta saan a nagaw-awid iti balayda iti tallo nga aldaw.
Nupay kasta, bayat nga agab-abano daytoy iti gardenda, nakitana ti maysa a bangkay a nabigbigna nga isu ti asawana gapu iti bado a suotna. Dagus met nga inyawagna daytoy kadagiti awtoridad.
Sigun met kenni PCapt. Pasiwen, addan ti persons of interest dagitoy nu sadino kwarta ti posible a rason iti ipupusay ti biktima. Naduktalan iti imbestigasyon dagiti awtoridad nga adda ti nakadwa ken nakainuman ti biktima idi Mayo 28 iti kubo ti gardenna sakbay a nasarakan daytoy a bangkay. Narekober manipud iti kubo dagiti sumagmamano a bote ti arak ken dadduma pay nga ebidensya.
Posible a naaddaan iti saan a panagkikinnaawatan ti biktima ken dagiti nakadwana a nagresulta iti nasao nga insidente.
Iti agdama ket maur uray ti resulta ti otopsiya iti bangkay ti biktima bayat a maisagsagana metten ti kaskenan a dokumento para iti pannakaipila ti kaskenan a kaso kontra kadagiti suspek.
Umap-apela met ti pamilya iti hustisya bayat a kidkiddawen dagiti awtoridad iti publiko a liklikanda nga agipablaak iti ladawan a konektado iti insidente kas iti pakabigbigan dagiti suspek tapno saan a madadael ti ipatpatungpalda nga imbestigasyon. // Bombo Noveh Organo
