Nakemmeg ti pakabuklan a tallo pulo ket walo nga iligal nga agilaklako ti registered SIM cards, a sumagmamano kadagitoy ket menor de edad iti bulan ti Enero.
Sigun iti National Police -Anti Cybercrime Group (PNP-ACG), nakumpiskarda ti agarup 7,900 SIM cards manipod iti entrapment operations manipod Enero a uno agingga trentay uno iti agdama a tawen.
Naduktalan dagiti otoridad a ti sangapulo ket siam kadagiti SIM cards ket nai-link kadagiti e-wallet ken bank account.
Idi laeng Lunes, natiliw ti maysa a babai nga agtawen ti sangapulo ket lima gapu iti iligal a panangilakona kadagiti registered SIM cards iti online. Natakuatan isuna iti entrapment operation idiay Bocaue, Bulacan.
Sigun kenni Brigadier General Bernard R. Yang, PNP-ACG Director, makapalaarma dagiti indibidual a makipaspaset iti iligal nga aktibidad.
Gapu iti dayta, indagadagna kadagiti nagannak ken guardians ti panangisuroda kadagiti annakda iti legal a pagbanagan ti cybercrime.
