BAGUIO CITY – Nakumpiskar ti maysa a Glock 17 Gen5 pistol, magasin, ken pito a piraso a 9mm ammunition, ti maysa a 39-anyos a lalaki, caretaker iti maysa a balay sadiay Bermuda Hill, Baguio City, ita nga aldaw, Agosto 12.
Maibasar iti report, nagpinnudot dagitoy iti maysa a 49-anyos a taxi driver a residente iti Bermuda Hill Subdivision, Baguio City.
Nangrugi ti nasao a diskusyon gapu iti road rage. Mapapati met nga bayat ti panagpinnudot dagitoy, inruar ti lalaki ti paltogna ken inkasana.
Kalpasan ti insidente, nagreport ti security guard ti nasao a subdivision iti Baguio City Police Office–Station 1.
Dagus a nagturong dagiti otoridad iti lugar tapno beripikaren ti report. Bayat ti panagtutungtongda, nagdesisyon dagitoy nga agturong iti nasao a police station.
Boluntaryo met nga insurrender ti lalaki ti nasao a paltog ken impakitana met ti lisensiana.
Sigun iti otoridad, rehistrado ken addaan lisensia ti lalaki iti panangiggemna iti paltog. Nupay kasta, naduktalan nga expire ti permit to carry outside residence wenno PTCOR daytoy.
Kabayatanna, desidido met ti taxi driver a mangipila iti kaso a grave threats kontra iti lalaki.
Iti agdama, adda iti kustodiya ti pulisya ti lalaki ket sangoenna ti kaso iti sidong ti Comprehensive Firearms and Ammunition Regulation Act wenno Republic Act No. 10591, kasta met iti kaso a grave threats.| via Bombo Khey Reparip
