BAGUIO CITY – Idauluan ti Cordillera Regional Disaster Risk Reduction and Management Council babaen iti Office of Civil Defense-Cordillera ti panakaipatungpal ti third quarter Nationwide Simultaneous Earthquake Drill (NSED) inton September 10 iti eksakto alas-dos ti malem ditoy rehion Cordillera.
Sigun kenni OCD-Cordillera Regional Director Albert Mogol, paset daytoy ti agtultuloy a panangital-o-da kadagiti komunidad a resilient wenno naibtor manipud iti gingined.
Nupay kasta, maipatungpal ita ti NSED iti online babaen iti ceremonial pressing ti button manipud iti National DRRM Council agingga kadagiti local government units kas senyal iti panakaipatungpal ti ‘duck, cover and hold’ procedure.
Daytoy ket gapu iti agdama a pandemya nga ituntunda ti COVID-19 ken kas panagtungpal iti biosafety protocols.
Napagnumuan met ti amin a member-agencies ti Cordillera Regional DRRM Council, Local DRMM Councils ken Barangay DRRM Committees ken amin nga stakeholder ti panangisayangaktda iti nasao a drill ken iti amin a related activities iti online ken information and communication campaigns.
Inyunay-unay pay ni Mogol ti pagkasapulan iti agtultuloy a panagsagana kontra iti gingined.
