Ginuyugoy ti maysa a healthy food practitioner iti siudad ti Baguio dagiti naganna nga agbalin a pangguadan iti panangpili iti nasustansya a taraon para kadagiti annakda.
Sigun kenni Elmer Macalingay, maysa a mangitantandudo iti sistema ti “slow food”, napateg ti pannakaisubli ti umno a nutrision kadagiti pagadalan iti baet ti panagayat dagiti agtutubo iti fast food.
Kinunana nga ad-adda a nalaklaka ken nalaka a maisagana ti healthy food, ken rumbeng nga agbalin laeng a “creative” dagiti nagannak iti panangiluto tapno maguyugoy dagiti ubbing a mangan iti nateng.
Ti “slow food” ket maysa a tignay a mangitantandudo iti nadalus, patas ken “sustainble food,” kasta metten ti panangaywan iti aglawlaw ken ti lokal a tradision.
Kabayatanna, impaganetget met dagiti eksperto manipod iti Department of Agriculture ti kinapateg ti nasayaat a panangiprodyus ken panagaramat iti good agricultural practices tapno maipasigurado ti kinatalged ken kalidad iti taraon.
Impaganetget metlaeng dagiti nutritionist a ti pannangan iti nasustansia ket dakkel ti epektona iti salun-at ken kasapulan ti panagbalbaliw iti lifestyle.
