BAGUIO CITY – Marugian inton bigat, September 6 ti public hearing nga isayangkat ti DOLE-Cordillera Regional Tripartite Wages and Productivity Board para iti panakaipangato ti minimum a sweldo ditoy rehiyon.
Maibasar iti paka-ammo manipud DOLE-Cordillera, ti umuna a public hearing inton bigat ket maisayangkat sadiay Calaba, Bangued, Abra.
Maikadua a hearing ket inton September 11 sadiay Bulanao, Tabuk City, Kalinga para kadagiti probinsia ti Kalinga ken Apayao.
Maikatlo a hearing ket inton September 12 sadiay Poblacion South, Lagawe, Ifugao.
Maudi a hearing ket inton September 17 iti maysa a hotel sadiay Legarda Road, Baguio City para iti Benguet ken Baguio.
Naudi a naipangato ti sweldo dagiti minimum wage earners ditoy rehiyon idi napalabas a tawen babaen iti Wage Order No. RB-CAR-19 a nag-epektibo idi August 20, 2018.
Babaen iti public hearing ket mangngegan dagiti maseknan nga ahensia ken stakeholders dagiti arungaing dagiti minimum wage earners ditoy rehiyon ken no epektibo ti immuna a panakaipangato ti minimum a sweldo idi 2018.
