BAGUIO CITY – Pimmusay ti maysa a menor de edad a lalaki kalpasan a nalmes iti maysa a swimming pool sadiay Poblacion, Buguias, Benguet idi kanikadua.
Nabigbig daytoy a ni Johnrey Segundo Apilis, 4-anyos ken residente ti Palinta-ang, Mansoyosoy, Tinoc, Ifugao.
Maibasar iti imbestigasyon, nagturong ti biktima iti pool bayat a makumikom dagiti kakabagianna nga agisagsagana iti taraon.
Kinuna ti caretaker ti swimming pool a nakitana pay ti biktima a nakatakder iti nagbaetan ti paglangoyan dagiti natataengan ken ti paglangoyan dagiti ubbing.
Kalpasan ti sumagmamano a minutos ket nakitana ti ubing a tumtumpaw isut gapuna a dagus nga inispalna daytoy, kabinnadang ti asawana.
Inaplikaranda pay iti first aid ti ubing sakbay nga intarayda iti pagagasan ngem naideklara daytoy a dead on arrival.
