BAGUIO CITY – Sumangsango iti nagtutuon a kaso dagiti uppat a drug suspects a nakipinnaltog kadagiti pulis kabayatan ti panakaipatungpal ti buy-bust operation kontra kadagitoy sadiay Felipe Jose Street, Lower Rock Quarry, Baguio City idi kanikadua.
Nabigbig dagitoy a da Michael Dumagcao, 41-anyos, residente ti Loakan-Magsaysay; Alberto England, 28-anyos, residente ti Lourdes Subdivision Extension; John Michael Garcia, 30-anyos, residente ti Mirador-Dominican; ken ni Louie Clemente, 25-anyos, residente ti Lower Rock Quarry, siudad ti Baguio.
Sigun iti Baguio City Police Office, sumangsango dagiti suspek iti kaso a panaglabsing iti RA 9165 wenno Comprehensive Dangerous Drugs Act of 2002, illegal possession of firearms, direct assault upon an agent of person in authority ken multiple damage to properties.
Maipalagip a kabayatan ti buybust operation ket nadlaw dagiti suspek a makitatransaksionda iti pulis isut gapuna a pinaputukanda iti paltog dagiti operatiba sakbay a ginandatda nga aglibas.
Nupay kasta, gaputa nakaballangan iti kalsada ti lugan dagiti pulis ket dinungpar dagiti suspek ti lugan dagiti pulis bayat a nairaman dagiti dadduma a lugan a nakaparada iti nasao a lugar.
Nakumpiskar met manipud kadagiti suspek ti dua a sachets ti mapapati a shabu, maysa a caliber 9mm, maysa a magazine a naglaon ti walo a bala ken ti dua a cellphones ken ti lugan a naaramat iti transaksion.
