Manarimaan ti koordinasyon ti gobyerno ti Pilipinas kadagiti opisyales ti Brunei tapno maispal ti biag dagiti uppat a Pilipino a nasentensiyaan ti dusa a patay.
Sigun kenni Department of Migrant Workers acting secretary Hans Leo Cacdac, kiniddaw ti Pilipinas iti Brunei nga ipaayanda ti pardon wenno ipababada ti pannusa dagiti uppat a Pilipino iti life imprisonment wenno tungpal biag a pannakaibalud imbes a death row.
Idi napan a lawas ket binisita ni Cacdac ti dua nga Overseas Filipino Workers a nakabalud idiay Brunei bayat ti dua nga aldaw nga state visit ni President Ferdinand Marcos Jr. idiay Brunei Darussalam idi Mayo 28 agingga Mayo 29.
Karaman kadagiti nakabalud a Pilipino idiay Brunei ket ni Cyrile Tagapan sipud pay 2016 kalpasan a senentensiyaan ti korte a guilty iti panangpapatay iti Bruneian citizen ken addaan pay ti kaso nga arson ken theft.
Malaksid iti daytoy, kiniddaw metlaeng ti gobyerno ti Pilipinas idiay Brunei ti nasapsapa a pannakawaya-waya dagiti dua a Pilipino a dandani agtawen iti pito pulo.
Karaman ditoy ni Edgar Puzon a naibalud gapu iti panangpapatayna iti padana metlaeng a Pilipino idi tawen 2005 nu sadino nasentensiyaan daytoy ti tungpal biag a pannakaibalud.
Dinakamat ni Cacdac a dumanon iti pito pulo a Pilipino manipud iti nagduduma a pagilian ti nasentensiyaan ti dusa a patay nu sadino kaadoan kadagitoy ket adda idiay Saudi Arabia ken Malaysia.
