BAGUIO CITY – Nakemmeg ti uppat a lallaki gapu iti panangdangdangranda iti maysa a gangannaet sadiay Ledesma Street, Aurora Hill, Baguio City idi kalman.
Nabigbig dagitoy a da Emmerson Jebs Barbacena, 25-anyos; Jimmy Guinto, 23-anyos; John Galvan, 18-anyos, bin-ig a residente ti South Central, Aurora Hill, Baguio City ken ni Rommel Palangdeo, 18-anyos, residente ti Brookspoint, Baguio City.
Nabigbig met ti biktima dagitoy a ni Abdulaziz Mohammed Alsagheer, 18-anyos, estudyante, tubo ti Yemen ken agnanaed iti nakapasamakan ti insidente.
Maibasar iti report, paturong ti biktima ken ti kakaduanda paturong iti Ledesma Street manipud iti South Central, Aurora Hill idi nasabatda ti grupo ti uppat a lallaki.
Kinarit ti grupo dagiti nasao a lallaki ti biktima ken dagiti kakaduana babaen iti panangisawangda kadagiti pannarita a saan a maawatan ti biktima ken dagiti kakadua daytoy.
Killaat nga induron dagiti suspek ti biktima ken sadiay a dinandanog dagiti suspek ti nagduduma a paset ti bagi ti biktima ken maysa pay kadagiti suspek ti nangibarsak iti botelya a timmama iti muging ti biktima.
Nangitunda daytoy iti panakadunor ti muging ti biktima.
Sumangsango met dagiti nakemmeg a suspek iti kaskenan a kaso.
