BAGUIO CITY – Naituding a makilaban iti ONE: Winter Warriors II sadiay Singapore ti uppat a Pinoy mixed martial artists (MMA) fighters manipud iti nalatak a Team Lakay.
Maibasar iti impormasyon, maimatangan ditoy ti mapadpadaanan a promotional debut (DEBU) da Stephen Loman ken Jhanlo Sangiao.
Ni Loman ket sigud a Brave Bantamweight World Champion sakbay nga immakar iti ONE Championship bayat a ti 19-anyos a ni Jhanlo ket anak ni Team Lakay head coach Mark Sangiao.
Maimatangan metlaeng ti laban ni sigud a ONE Bantamweight World Champion Kevin Belingon kontra kenni Kwon Won Il ti South Korea.
Maipalagip a bin-ig a naabak ti 34-anyos a ni Belingon iti tallo a nagsasaruno a labanna, pakairamanan ti panaka-abakna kontra kenni sigud nga UFC fighter John Lineker idi October 2020.
Nairaman pay iti fight card ti laban ni Danny Kingad kalpasan ti dumanon dua a tawen a kaawan ti laban daytoy.
Nupay kasta, awan pay ti naituding nga aldaw a pakaisayangkatan ti ONE: Winter Warriors II.
Kabayatanna, agserbi met a main event ti ONE: NEXTGEN 3 inton November 26 ti laban ni Igorot MMA fighter Lito Adiwang kontra kenni Jarred Brooks.
Depensaan ni Adiwang ti maika-lima a contender spot daytoy iti strawweight division.
