BAGUIO CITY – Nadangran ti uppat nga indibidual iti nagsina nga insidente ditoy rehion Cordillera idi kalman.
Immuna a nadangran ni Domingo Osec Tigui-ing, 55-anyos, mechanical underground supervisor ken residente ti Poblacion, Mankayan, Benguet kalpasan a natnag iti rangkis ti imanmanehona a wrangler jitney iti Mankayan-Abatan National Road, partikular sadiay Tubo, Sapid, Mankayan, Benguet.
Maibasar iti report, paturong ti lugan sadiay Mankayan manipud Besao, Mt. Province ken idi nakadanun iti kurba a paset ti kalsada ket naiturogan ti driver bayat ti panagmanehona ken napukaw ti kontrolna iti lugan.
Natnag ti lugan iti rangkis nga addaan kauneg a 15 a metro ken nagdisso iti waig iti baba ti kalsada bayat a nagsagrap ni Tigui-ing iti gasgas iti muging.
Naiturong met iti pagagasan da Sanny Maguiwe Mag-in, Rustom Lapchoc Mag-in ken ni Marcos Po-awan Naila a bin-ig a residente ti Aguinaldo, Ifugao kalpasan a natnag iti rangkis ti naglugananda a parapasahero a jeep iti national road sadiay Talite, Aguinaldo, Ifugao.
Maibasar iti report, paawid ti nasao a lugan ken agkurba kuman iti kalsada idi killaat a nagpaigid daytoy agingga a napukaw ti driver a ni Ramil Lapchoc Mag-in ti kontrolna iti lugan a nangitunda tapnu matnagda iti rangkis nga addaan kauneg a 70 a metro.
Nagsagrap dagiti tallo a pasahero iti nagduduma a dunor iti bagi bayat a saan a naan-ano ti driver.
