BAGUIO CITY – Nakemmeg ti uppat nga indibidual kalpasan a naalaan dagitoy iti igam, bala ken subversive documents iti checkpoint ti pulisya sadiay Sitio Tiiwan, Poblacion, Hungduan, Ifugao idi kanikadua.
Immuna iti daytoy, pinara dagiti personnel ti Hungduan PNP ti dua a motorsiklo nga imanmaneho da Hernanie Madani Lamhi a.k.a. Hernan ken Ben Madani Baguilat a.k.a. Cresendo, agpada a mannalon ken residente ti Daclanto, Wangwang, Tinoc, Ifugao.
Nabigbig met dagiti back riders a da John Lee Navarro Hondrado a.k.a. Hernan, maatap a kameng ti NPA a residente ti Posadas, Sara, Ilo-ilo ken ni Justine Buarao Aquino a.k.a. ‘Ka Macoy’ a residente ti Tondo, Manila.
Nakumpiskar ti pulisya manipud kadagiti uppat ti 2 a paltog; magazine a naglaon ti 26 a bala; maysa a binocular; saggaysa a kutsilyo ken buneng; cash a P1,700; sumagmamano a subversive documents ken mapa ti Hungduan ken Tinoc, Ifugao; pocket wi-fi gadget; nagduduma a cellphone ken uppat nga IDs.
Dagus a nakemmeg dagitoy kalpasan a napaayda a mangipakita iti kaskenan a dokumento.-
