BAGUIO CITY – Pimmusay ti uppat a miembro ti Kalinga Provincial Public Safety Company bayat a kritikal ti tallo a dadduma pay kalpasan a limmaban kadakuada ti high value target a ni Willy Sagasag nga iserbianda kuma iti warrant of arrest sadiay Lubnac, Lubuagan, Kalinga.
Segun kenni PSSupt. Brent Madjaco, provincial director ti Kalinga Police, karaman kadagiti pimmusay da PO3 Cruzaldo Lawagan, PO2 Jovenal Aguinaldo, P01 Charles Compas, ken ni PO1 Vincent Paul Tay-od a bin-ig a taga-Kalinga.
Nadangran met da PSI Edward Liclic, PO1 Ferdinand Assuncion, ken ni PO1 Ferdie Liwag, ken matamtamingda ita iti Kalinga Provincial Hospital.
Kinuna ni Madjaco a pimmusay met laeng iti nasao nga engkwentro ni Sagasag a maibilbilang a high value target ti pulisya gapu iti kaso nito daytoy a murder ken dadduma pay a krimen.
Daytoy ti lider ti maysa a robbery gang a maitudtudo a suspek iti panagsaneb kadagiti pulis sadiay Kalinga idi 2002 a nakatayan ti tallo a pulis.
Naamuan nga addaan daytoy iti ‘patong’ iti ulo a P600,000.00.
Immunan a nakemmeg ni Sagasag idi April 1998 ken 2001 ngem nakalibas daytoy.
Iti agdama ket nangipatuloden ti 503rd Infantry Brigade iti pwersada sadiay Kalinga tapnu tumulong iti operasyon nangruna ta saanda a masigurado nu asino dagiti kakadwa ni Sagasag a nakarinnupak dagiti pulis sadiay.
